டோ டோ பறவையின் ஞாபகங்களுடன்

கடந்த ஞாயிறு 14.06.09 மாலை 4.30மணியளவில், இரு மலேசிய எழுத்தாளர்களின் நூல் அறிமுகத்துடன் நவீன எழுத்துகள் சார்ந்த புரிதலுக்கான கலந்துரையாடலாக சிங்கப்பூர் தேசிய நூலகவாரியத்தின் 16வது (POD) மாடியில் எழுத்தாளர் பாலுமணிமாறனின் ‘தங்கமீன்’ பதிப்பக ஏற்பாட்டில் நடைபெற்றது.

உள்நுழைந்து வெளிரும் வரையில், பார்வையாளர் வருகையில் இருந்து நிழ்வில் நிறையவே வித்தியாசங்களை உணரமுடிந்தது. நிழவின் முதலாக தங்கமீன் பதிப்பக உரிமையாளர் எழுத்தாளர் பாலுமணிமாறன் வாழ்த்துரையும், நன்றியுரையையும் ஒருங்கே சொன்னார்.

பின்னர் பேசவந்த சிங்கப்பூரின் மூத்த எழுத்தாளர் இராம.கண்ணபிரான் அவர்கள் “நவீனவாதம் ஒரு பகிர்வு” எனும் தலைப்பில், அவருள் இன்னும் முழுமைபெறதா நவீனத் தேடலை மேலைநாடுகளில் தொடங்கி, தமிழக எழுத்துகளின் மீதான நவீனத் தோன்றலுடன், ஈழ இலக்கியங்களின் நவீன வாழ்வியலையும், மலேசிய சிங்கப்பூர் நவீன வாதம் என ஐந்து கட்டங்களாக பிரித்தளிக்கபட்ட கட்டுரையை நிறைவுசெய்தபோது அறிவியல் சமன்பாடுகளாக பரிணமித்து பார்வையாளர்கள் முன் சிக்கலான பிம்பத்தையே தோற்றுவித்தது.

நவீனம், பின்நவீனத்தின் கூறுகளை எழுத்தாளர் சித்ரா ரமேஷ் பல்வேறு வண்ணச்சிதறல்களாக நவீன உலகின் வாழ்வியலையும், அதே வாழ்வியலை சங்ககாலத்திற்கும் எடுத்துச் சென்று இன்றைய, இயல்பான எதார்த்தமான விசயங்கள் இப்படித்தான் இருக்கவேண்டும் என்றுச்சொல்லி பள்ளிக்கூடம், பெண்ணியம் ஊடாகங்களை கடந்து பல்வேறு இசங்களைச் சுட்டி சொல்லப்பட்ட செரிவான செய்திகளை வாசகர்கள் உட்புகுந்து வந்தார்களா என்பதைவிட, கடைசியில் சொல்லப்பட்ட டோ டோ பறவையின் ஞாபகங்களை எல்லோர் மனதிலும் ஆழமாக பதிந்திருக்ககூடும். அன்றைய இரவு உறக்கத்தில் டோரா புஜ்ஜியாக டோ டோ பறவையும் அதன் அழிவால் எப்படி டோ டோ மரங்களும் இன்று நம்மிடையே வெறும் பெயர்களாக இருக்கிறது என்ற பிம்பங்களைச் சுமந்து விடியும் வரையில் ஆக்ரமித்துக் கொண்டிருந்தது.

பின்னர் எழுத்தாளர்களே நூலினை அறிமுகம் செய்யும் நிகழ்வு அரங்கேறியது. 700 சிறுகதைகள் எழுதிய மலேசிய எழுத்தாளர் ஏ.தேவராஜன் அவர்களின் ‘அரிதாரம் கலைந்தவன்’ எனும் முதல் சிறுகதை தொகுப்பை வெளியிட எழுத்தாளர் புதுமைத்தேனீ அன்பழகன் அவர்கள் முதல் பிரதியை பெற்றுக்கொண்டனர். அதன்பின் பரவலாக கவனம்பெற்றிருக்கும் மற்றொரு மலேசிய இளம் எழுத்தாளர் கே.பாலமுருகன் தனது ‘கடவுள் அலையும் நகரம்’ முதல் கவிதை தொகுப்பை வெளியிட மூத்த எழுத்தாளர் இராம.கண்ணபிரான் பெற்றுக்கொண்டார்.

Devarajan Book Launch

‘எனது மேடு பள்ளங்கள்’ எனும் தலைப்பில் அரிதாரம் கலைந்தவன் எனும் சிறுகதை புத்தகத்தை எழுதிய மலேசிய எழுத்தாளர் ஏ.தேவராஜன் 80-களின் தொடக்கத்தில் இருந்து எழுதிய சிறுகதைகளின் வெளியையும், பரிச்சார்த்தமான முயற்சிகளை மேற்கொண்ட சிறுகதைகளுடன் சிறுகதைகளுக்கான கூறுகளையும் எடுத்துக்காட்டி இது நவீனமாக என்று சிறுகதையை படித்துப்பார்த்து புரிந்துகொள்ளுங்கள் என்றபோது எல்லோருக்குள் ஒருவித இறுக்கம் சுமந்துகொண்டது. அந்த இறுக்கங்களையெல்லாம் தனக்குள் மற்றொரு திறமையை பொதித்து வைத்திருந்த 70ற்கும் மேற்பட்ட குரல்களில் பேசும் ஏ.தேவராஜன் சிலகுரல்களில் பேசிக்காட்டியபோது தங்களின் இறுக்கங்களையெல்லாம் மறந்து சிரித்துக்கொண்டிருந்த பார்வையாளர்களுடன் 16வது மாடிக்கட்டிடம் கொஞ்சம் சிலிர்த்துத்தான் போயிருக்ககூடும்.

Bala Book Launch

‘கடவுள் அலையும் நகரம்’ எனும் தனது முதல் கவிதை தொகுப்பை அறிமுகப்படுத்திய மலேசிய இளம் எழுத்தாளர் கே.பாலமுருகன் ‘நானும் எனது கடவுள் அலையும் நகரம்’ எனும் தலைப்பில் ஆரம்பகாலத்தில் கவர்சியான காதல்கவிதைகளை எழுதி சுற்றிக்கொண்டிருத்தவன் என்று பட்டவர்தனமாக ஆரம்பித்து, தற்செயலான நிகழ்வாக கல்லூரிக் காலகட்டத்தில் வாசிக்கபட்ட நவீனம் சார்ந்த எழுத்தாளர்களைசுட்டி மறுவாசிப்பின் வழியேதான் அவர்கள் முன்வைத்த சிக்கல்களை, புரிதல்களை எனக்குள் கிரகிக்கமுடிந்தது என்றும், தனது கடவுள் அலையும் நகரத்தின் கடவுள் என்பது ஒரு குறியீடு, அந்த குறியீடு தனது இயல்பு வாழ்க்கையை சிதைத்து வாழ்ந்துகொண்டிருக்கிற மனிதர்களே என்பதை சில கவிதைகளின் வழியே புனிதபிம்பங்களையும், மனிதனை உற்பத்தியாக மாற்றும் நகரத்தின் பரபரப்புகளையும் உணர்வு சார்ந்து உடைத்தெறிந்தார். இருப்பினும் என்னற்ற வளர்ச்சிகளை தனக்குள் உள்ளடக்கி வானுயர்ந்து வளர்ந்திருந்த கட்டிடத்திற்குள் நின்றுகொண்டு இன்றும் ஆடுகளை வெட்டிக்கொண்டிருக்கறார்கள், இராமர்பாலம் என்றுச் சொல்லி முடக்கப்பட்ட திட்டங்களை முன்வைத்து வாழ்தலுக்கு சாத்தியமில்லாத எழுத்து படைப்பில் மட்டுமே நவீனத்தை உள்ளடக்கியிருக்கிறது, மாற அன்பு மட்டுமே நிரந்தரமானது அன்பாக இருங்கள் என்றபோது இவருக்கு முன் வந்தவர்களால் கட்டமைக்கப்பட்ட பிம்பங்கள் சுக்கு நூறாக உடைந்து நொறுங்கியதை பார்வையாளர்கள் உணர்ந்திருக்க்க் கூடும்.

பரவலாக எதிர்பார்க்கப்பட்ட கலந்துரையாடலின் துவக்கத்தில் மலேசிய மூத்த எழுத்தாளர் சை.பீர்முகம்மது சிங்கப்பூரின் பழமையை ஞாபகப்படுத்தி எது நவீனம் பின்நவீனம் என்றால் எல்லாமே மக்கள் விரும்பவேண்டும் என்பதை மனதில் வைத்து படைக்கவேண்டும் என்றார். இடையிடையே எழுத்தாளர் சித்ரா ரமேஷ் அவர்கள் சை.பீர்முகமதுவின் கருத்துகளுக்கு பெண்ணியம் சார்ந்த சில கருத்துகளை முன்வைத்தார். பின்னர் தொலைபேசிவாயிலாக ‘கொரியா கண்ணனிடம்’ எழுத்தாளர் ஜெயந்தி சங்கர் சில கேள்விகளை முன்வைத்தார் பார்வையாளர்களும் தங்களுக்குள் எழுந்த சந்தேகங்களை கேட்டறிந்தனர். இவரைத்தொடர்ந்து தமிழக எழுத்தாளர் ‘உயிர்மை’ இதழ் ஆசிரியர் ‘மனுஸ்யபுத்திரனுடன்’ தொலைத்தொடர்பை ஏற்படுத்த பின் நவீனம் பின்பின் நவீனம் என்று நகர்ந்துவிட்ட சூழலில் நவீனக் கவிதைகளை மறுவாசிப்பு தொடர்ச்சியான வாசித்தலின் வழியேதான் அடையாளம் காணமுடியும் என்றபோது நகரவாழ்வின் பரபரப்பில் தங்களின் சுயத்தை இழந்துகொண்டிருந்த மனிதர்கள் கலைந்துசெல்லத் துவங்கியிருந்தனர்.

தங்கமீன் பதிப்பகம் வெளியீட்டு புத்தகங்கள் ஒவ்வொன்றும் படைப்புசார்ந்தும் ‘கலவை’ சிறுகதைதொகுப்பின் ஒரு நாள் நிகழ்வு, ‘பயாஸ்கோப்காரன்’ வழியே மலேசிய எழுத்தாளர்களுடன் கலந்துரையாடல், இன்று புரிதலை நோக்கிய பயணம் என்று சிறு சலனங்களை ஏற்படுத்தும் நிகழ்வாகவே முன்னெடுத்துச் செல்லும் இந்தப் பயணம் விமர்சனங்களை கடந்தும் தொடரவேண்டும்.

தனி மனிதர்களாக நகர்த்திக்கொண்டிருக்கும் இந்த மலேசிய சிங்கப்பூர் இலக்கிய நிகழ்வுகள் ஒரு குழுவாக அல்லது இன்னும் சிலர் சேர்ந்து இயங்கும்போது கூடுதலான இடப்பெயர்வுகளை உருவாக்கலாம். உருவாக்கப்படவுண்டிய சிங்கப்பூரின் தமிழ் இளம் எழுத்தாளர்கள் டோ டோ பறவையின் ஞாபகங்களாக ஆக்கப்படுவதற்கு முன் வாசிப்பதற்கு சிறந்த களத்தினை ஏற்படுத்தியிருக்கும் சிங்கப்பூர் அரசின் செயல்பாடுகள் அர்த்தம்பொதிந்த கனவாக….

பாண்டித்துரை

‘தனி’ குறும்படம் ஜீன் 20 சென்னையில்

solitary invitation copy

ஜீன் 21 அன்று சென்னையில் – உயிர் எழுத்து – 25 வது இதழ் – ஒரு நிகழ்வு

inv

ஒரு நாடற்ற இனத்தின் பேரவலம் (ஈழம்)

இந்தக் கொடுங்கனவு தமிழர்களின் நினைவுகளில், அந்த நினைவுகளால் எழுதப்படப்போகும் சரித்திரத்தில் நிரந்தரமாகப் படிந்துவிட்டது. உலகெங்கும் பரந்திருக்கும் தமிழர்கள் வரலாற்றில் இதற்கு நிகரான ஒரு கொடுங்கனவு எப்போதும் நிகழ்ந்த்தில்லை. பிரபாகரனின் உடல் என்று காட்டப்பட்ட ஒரு பிம்பம் தமிழ்ச் சமூகத்தின் ஆழ்மனதை சிதைத்ததுபோல இன்னொரு பிம்பம் சிதைத்ததில்லை. ஈழப்போரட்டத்தின் துயரக்கதைகளையும் சாகசக் கதைகளையும் இடையறாது கேட்டு வளர்ந்த ஒரு தலைமுறையைச் சேர்ந்தவன் என்ற முறையில் அந்தப் போராட்டம் இன்று அழித்தொழிக்கப்பட்டிருக்கும் காட்சி ஏற்படுத்தும் வெறுமையும் கசப்பும் கடந்துசெல்லக் கூடியதல்ல. விடுதலைப் புலிகளும் பிரபாகரனும் இன்று தோற்கடிக்கப்பட்ட குரூரமாக சிதைக்கப்பட்ட தமிழ் அடையாளத்தின் வடிவமாக மாறியிருக்கிறார்கள். இந்த யுத்தத்தில் படுகொலைசெய்யப்பட்ட ஒரு லட்சம் தமிழர்கள் சர்வதேச அரச பயங்கரவாதத்தால் அழிக்கப்பட்ட ஒரு இனத்தின் ரத்த சாட்சியாக இருக்கிறார்கள். இந்தக் கணத்தில் புலம் பெயர்ந்து வாழும் ஈழத் தமிழர்கள் மட்டுமல்ல, தமிழ் என்ற மொழிப்பிரதேசத்தில், நாடற்றவனாக, நிலமற்றவனாக, மிகக் குரூரமாக தோற்கடிக்கப்பட்டவனாக உணர்கிறேன். நாஜிக்களால் படுகொலை செய்யப்பட்ட யூதர்கள் இவ்வாறுதான் உணர்ந்திருக்கக் கூடும். தமிழ் அடையாள உணர்வுக்கு வெளியே, அன்னியர்கள் இந்த்த் துயரத்தை புரிந்து கொள்வது கடினமானது. அவர்கள் புலிகளின் அரசியல் தவறுகளைப் பற்றி பேசுவதன் வழியே தெற்காசியாவில் நிகழ்த்தப்பட்டிருக்கும் இந்த மாபெரும் இனப்படுகொலையை சமன்படுத்திவிடக் கூடும். ஆனால் இந்தக் காயம் இந்த வீழ்ச்சியி புலிகளின் வீழ்ச்சி அல்ல. வேட்டையாடப்பட்ட ஒரு இனக் குழுவின், படுகளத்தில் கைவிடப்பட்ட ஒரு மக்கள் சமூகத்தின் வீழ்ச்சியின் சரித்திரம் இது.

 

சிங்கள மக்கள் இந்த வெற்றியை பிரம்மாண்டமாக கொண்டாடிக் கொண்டிருக்கிறார்கள். அவர்களது முரசங்களை அதிரச் செய்தபடி நடனமாடிக் கொண்டிருக்கிறார்கள். ஒரு இனத்தின்மீது கொள்ளப்டபட்ட வெற்றியின் நடனம். பயங்கரவாதத்தை வெற்றி கொண்டதற்கான உலக நாடுகள் இலங்கை அரசுக்கு வாழ்த்துகளை அனுப்பிக் கொண்டிருக்கின்றன. இலங்கையில் நடந்த இந்த பச்சை ரத்த இனப் படுகொலையை ‘அத்து மீறல்கள்’ என மென்மையான குரலில் சில மனிதாபிமான சக்திகள் கண்டித்து வருகின்றன. சரணடைய வந்த புலிகளின் தலைவர்களையும் தளபதிகளையும் கொன்று தீர்த்த ராஜபக்சேவின் அரசு ஒரு மறுப்பு அறிக்கையின் மூலம் தனது கொடூரமான போர்க் குற்றங்களை மறைத்துவிட்டது. ராஜபக்சேவின் ராணுவத்தின் போராட்டத்தையும் பிறகு பிணங்களையும் காட்டி கொடுத்தவர்கள் இனி பொம்மை அரசுகளுக்கு தலைமை தாங்கி நீதியையும் ஜனநாயகத்தையும் நிலைநாட்டுவார்கள். தமிழர்களுக்கு எதிரான இந்த யுத்தத்தில் முக்கிய பங்கு வகித்த இந்தியாவும் சீனாவும் தங்களது எதிர்கால யுத்த தந்நிரங்களுக்காக இந்தச் சின்னஞ்சிறுதீவை மேலாதிக்கம் செலுத்த தொடர்ந்து போட்டியிடும்.

 

தமிழர்கள் மீது இழைக்கப்பட்ட இவ்வளவு குரூரமான இனப்படுகொலைக்கு எதிராக தலையிட சர்வதேச அரங்கில் எந்த நாடும் முன்வரவில்லை. மன்னிக்கமுடியாத போர்க்குற்றங்களை இழைத்திருக்கும் ஒரு அரசாங்கத்தை உறுதியுடன் கண்டிக்க ஜ.நா உட்பட எந்த சர்வதேச அமைப்பும் முயற்சிக்கவில்லை. நவீன உலக வரலாற்றில் இந்த அளவிற்கு புறக்கணிக்கப்பட்ட ஒரு மனித்த துயரம் இனப்படுகொலை வேறு எதுவும் இல்லை. தமிழர்கள் ஆங்காங்கே தெருமுனைகளில் ஆர்ப்பாட்டம் செய்து தடியடி வாங்கிக் கொண்டு கலைந்துபோகிறார்கள். கவிதைகள் எழுகிறார்கள். கபட அரசியல்வாதிகளின் கையில் தங்கள் கனவுகளையும் நம்பிக்கைகளையும் கையளிக்கிறார்கள். அவர்கள் எவ்வளவு பெரிய அழிவிற்கு ஆட்படுத்தப்பட்டாலும் அவர்களால் செய்யக் கூடியது எல்லாம் அது மட்டுமே.

 

இலட்சக்கணக்கான மக்கள் இலங்கை அரசின் தடுப்பு முகமாம்களில் பசியிலும் பட்டினியிலும் செத்துக் கொண்டிருக்கிறார்கள். இந்த மக்களின் எதிர்காலம் குறித்த கேள்விகளுக்குப் பதில் ஏதும் இல்லை. தனது இனப்படுகொலையின் சாட்சியங்களை மறைப்பதில் மும்மரமாக இருக்கும் இலங்கை அரசு சர்வதேச உதவி நிறுவனங்களை அனுமதிக்க மறுத்து வருகிறது.

 

தனக்கென ஒரு நாடில்லாத ஒரு அரசு இல்லாத ஒரு இனத்தின் குரூரமான வீழ்ச்சி. இது என்றென்றும் நமது நினைவுகளில் நமக்கு பிந்தைய தலைமுறைகளின் நினைவுகளில் நிலைத்து நிற்கும். நாடற்றவனின் துயரம், கொலைக் களத்தில் தமக்காக பேசுபவர்கள் யாருமற்றவர்களின் துயரம் வரலாற்றின் அவர்கள் உயிர்த்தெழுவதற்கான வலிமையைக் கொடுத்திருக்கிறது. தமிழினமும் என்றேனும் ஒரு நாள் தனது தோல்வியிலிருந்தும் அழிவிலிருந்தும் உயிர்த்தெழும்.

 

இப்போது தமிகர்கள் எந்த நாட்டில் எந்த அரசின் கீழ் வாழ்ந்தாலும் அவர்கள் நாடற்றவர்கள், அகதிகள், தோற்கடிக்கப்பட்டவர்கள்.

 

 

மனுஸ்ய புத்திரன்

ஜீன் 2009 உயிர்மை இதழில் இருந்து.

 

நன்றி: மனுஸ்ய புத்திரன், உயிர்மை

நவீனத் தமிழ் இலக்கியம் – ஒரு புரிதலை நோக்கிய பயணம்

invit front

invit back 2

மிதிலைப்பட்டி கவிராயர்கள் – 14 – ஜீன் – 09

srilakshmi invitation

சிங்கப்பூரில் வசித்து வரும் முனைவர் எம்.எஸ்.ஸ்ரீலக்ஷ்மி -யின் “மிதிலைப்பட்டி கவிராயர்கள்” நூல் சென்னையில் ஜீன் 14 அன்று வெளியிடப்படுகிறது.